'യാത്ര'ക്കാരുടെ ശ്രദ്ധയ്ക്ക്:ഷരീഫ് അകലാട്

യാത്രക്കാരുടെ ശ്രദ്ധയ്ക്ക്:ഷരീഫ് അകലാട്

പല യാത്രകളുമിതിലേ കടന്നു പോയ്
മോചനത്തിനായ് രക്ഷക്കായ്
ഉണര്‍ത്തുവാനുമായ്
ഉറങ്ങുകയല്ല കൂട്ടരേ
കേരളജനത തളര്‍ന്നിരിക്കുകയാ
രക്ഷിച്ചില്ലെങ്കിലും ശിക്ഷിക്കരുത്
മോചിപ്പിച്ചില്ലെങ്കിലും ബന്ധനസ്ഥനാക്കരുത്
ഒരു നവകേരളം നല്കിയില്ലെങ്കിലുമീ
കേരളമിനിയുമവതാളത്തിലാക്കരുത്
കൊതിയൂറുന്ന പുന്ചിരികളും
പരിചിതമാര്‍ന്ന നോട്ടങ്ങളും
കസേരക്കളി തീരുംവരെയാവരുത്
ഇടയ്ക്കൊക്കെ വരണമിതിലേ...
തവണവ്യവസ്ഥയിലിരിക്കാന്‍
മനോഹരകസേര പണിതുതരുന്ന
പാവം മരപ്പണിക്കാരെ കാണാന്‍
ആടിനു തിന്നാനുള്ള പോസ്റ്ററുകളും
കടക്കാരനു കണക്കെഴുതാന്‍ നോട്ടീസുകളും
ഉടുതുണിക്കുമറുതുണിയോളം
പോന്ന കൊടിശീലകളും
ചോര്‍ന്നൊലില്ലുന്ന കൂരയ്ക്കുമേലെ
കൊണ്ടിടാന്‍ മാത്രമാവരുത്
ഫ്ലക്സുകളിലെ ചിരിയും ചിന്തയും
വാഗ്ദാനങ്ങളും അഭിവാദ്യങ്ങളും
ഇക്കുറിയെങ്കിലുമൊന്നോര്‍ക്കണമെത്രയോ
പാവങ്ങളുടെ വിലാപയാത്രകള്‍